GIYERA: MIRAFLORES KONTRA HARESCO SA AKLAN

Makabig eon nga deklarasyon it giyera ro pag-file ni dating Aklan Governor Joeben Miraflores it kandidatura agud nga kontrahon ro anang igkampod nga si incumbent ag last termer Congressman Ted Haresco sa segundo distrito it Aklan.

Madumduman nga nagpahayag eon it retirement sa politika si Miraflores pagkatapos it anang termino bilang gobernador ko nagtaliwan nga 2022.

Apang nagdesisyon nga magkandidato it uman bangud sa mainit nga away ni Haresco ag iba pa nga mga miyembro it Tibyog Akean local party nga nag-umpisa pagkatapos it election ku 2022.

Gina-eauman ro masandukot nga sambuwa it daywang ka mga political leaders ngara it Aklan nga nangin magkaibahan sa sueod it pilang ka mga nagtaliwan nga elections.

Bangud kara, antisiparon naton ro hugot nga pag-gamit nanda it andang mga resources, puder ag pwersa sa gobyerno.

Si Joeben paagi kay unopposed incumbent Governor ag anang unga nga si Joen Miraflores.

Si Haresco bilang incumbent nga congressman it segundo distrito ag suportado it Alyansa it mga daeagko nga partido it administrasyon paagi kay House Speaker Martin Romualdez.

Pareho sanda ra nga may mga ginasuportahan ag nagasuporta nga mga kandidato sa pagka-Mayor sa haeos kaeabanan nga mga kabanwahanan sa segundo distrito.

Nakataya dikara ro record ni Miraflores nga undefeated ag ro magiging paeaabuton it anang pamilya sa politika sa Aklan.

Samtang, nakataya man ro ikatlo nga termino ni Haresco ag paeaabuton sa politika it anang unga nga si Jose nga nag-umpisa eon sa pagkandidato bilang Sangguniang Panlalawigan member.

Kunta, raya hay sangka demokratiko eang nga proseso ag indi eang maigpit ro mga inosente nga pumueoyong Akeanon nga libre nga magagamit it andang kinamatarong sa pagpili ag indi magpugong sa developments sa probinsya it Aklan.

Kunta, sa ulihi hay mga Akeanon ro makapanipueos sa anda ngara nga away sa politika ag magpangibabaw gihapon ro respeto ag pagka magkapamilya nanda nga daywa.