Grupo ng mga menor de edad, nambugbog at nanggulo sa isang bar sa Kalibo

Dinampot ng Kalibo PNP ang mga menor de edad na nambugbog at nanggulo sa isang bar kagabi sa may Jaime Cardinal Sin St. sa Brgy. Andagaw, Kalibo.

Batay sa ulat, pauwi na at lumabas na ng bar dakong alas-10 kagabi ang biktimang si Josel Silvestre, 29, tubong Pampango, Libacao.

Pero sinundan ito at pinagbubugbog ng mga menor de edad na suspek na nag-iinuman sa loob ng bar.

Doon na tumulong na umawat ang mga bouncer ng mga katabing bar kaya umalis ang mga suspek sakay ng traysikel.

Makaraan ang ilang minuto ay bumalik pa ang mga ito sa bar pero hindi na pinapasok ng may-ari.

Nagalit ang mga ito kaya pinagbabato nila ang bar na nagdulot ng kaba sa iba pang mga customers.

Dahil dito, hinuli ng mga rumespondeng pulis ang mga suspek at ikinustodiya sa Kalibo PNP station para sa karampatang disposisyon.