ISA ARESTADO DAHIL SA ILEGAL NA SABONG

Lezo – Isa ang arestado habang nakatakas umano ang iba pa matapos makipaghabulan sa mga pulis ang mga sabungero kaninang hapon sa Mina, Lezo.

Bagama’t sinubukang tumakas, nadakip at naaresto parin ng mga pulis ang suspek na si Marc Adronil Reyes, 37 anyos ng nasabing lugar.

Ayon sa Lezo PNP, kaagad nilang ikinasa ang isang Anti Illegal Gambling Operation matapos umanong matunugan ang nangyayaring sabong sa lugar.

Kasunod nito, nahuli umano nila sa akto ang nasa walong sabungero doon, na kaagad namang tumakas at nakipaghabulan sa mga pulis hanggang sa ilog.

Kaagad namang inaresto at dinala sa presento ng Lezo PNP ang suspek kasama ang dalawang manok panabong at P300.00 na pera.

Sasampahan naman sa Lunes ang suspek na si Reyes ng kasong paglabag sa PD 449 o Anti-Illegal Cockfighting Law.