KAHERA NG RC SUPERMART AT KASABWAT, TIKLO SA PAGPAPALUSOT NG MGA GROCERIES NA WALANG BAYAD

Nabuko ang kuntsabahan ng isang kiosk vendor at kahera ng isang supermarket sa Kalibo na nagresulta sa kanilang pagkakadakip nitong Huwebes ng hapon.

Kapwa nahaharap ngayon sa kasong Qualified Theft ang empleyado ng RC Supermart na si Rejean Ruiz, 24 anyos ng Estancia, Kalibo at Nanette Flores, 39 anyos ng Brgy. Tigayon, Kalibo, Aklan.

Sa ulat ng Kalibo PNP, dakong alas-2:00 kahapon, nang maganap ang insidente sa isang kilalang supermart sa Kalibo.

Nabatid na kumuha ng groceries na may halagang P4328 ang kahera na dumaan sa counter pero nadiskubre ng mismong may-ari ng establisimento komersyal na P270 lang ang binayaran nito dahil pinunit niya ang naunang resibo.

Inamin naman ng mga suspek ang kanilang ginawa.

Handang magsampa ng kaso ang may-ari ng RC Supermart laban sa mga nadakip na suspek.