Kapatid na umawat sa away-mag-asawa, tinaga ng kanyang kuya

Dahil sa pag-awat sa away-mag-asawa, sugatan ang isang 20 anyos na binata matapos umanong tagain ng kanyang kuya kagabi sa Manhanip, Malinao.

Nakilala ang biktimang si Jeferson Imperial, na nagtamo ng sugat sa kaliwang balikat nang tagain ng kanyang kuya na si Renie Imperial, 40 anyos, kapwa residente ng nasabing lugar.

Sa imbestigasyon ng Radyo Todo, nabatid na nag-aaway umano noon ang suspek at kanyang asawa nang lapitan at awatin umano ng biktima.

Subali’t nagkainitan umano ang dalawa kung saan sinuntok ng kapatid ang kanyang kuya sa panga at mukha.

Samantala, nakita umano ng suspek na si Renie ang itak na hawak ng isa pa niyang kapatid, dahilan na inagaw umano niya ito at ginamit sa pagtaga kay Jeferson.

Sanhi ng kani-kanilang sugat at pinsala sa katawan, kapwa rin ginagamot ngayon sa ospital ang magkapatid, habang narekober naman ng mga pulis ang itak na ginamit sa krimen.