Kawatan sa gasolinahan,huli dahil sa kanyang tattoo

Rehas ang bagsak ng isang kawatan matapos manloob sa isang gasolinahan sa Brgy. Alimbo Baybay, Nabas, Aklan nitong Hunyo 23.

Kinilala ang suspek na si Ruel Taunan,21, residente ng Brgy. Yapak sa bayan ng Malay.

Naaresto si Taunan sa pamamagitan ng E-rogue System at ikinasang hot pursuit operation ng mga kapulisan matapos masapol ng CCTV ng MG Gasoline Station ang kanyang tattoo sa leeg na “Ruel”.

Napag-alaman na marami nang kaso ng pagnanakaw ang suspek simula ng ito’y menor-de-edad pa lamang.

Sa ngayon ay nasa kostudiya ng Nabas PNP station ang suspek at nahaharap sa kasong pagnanakaw.