LALAKI, ARESTADO MATAPOS MAGNAKAW NG FLAT SCREEN TV PARA IPAMBILI SANA NG BIGAS

Arestado ang isang lalaki matapos umanong ma ‘caught in the act’ habang ibinibenta ang ninakaw flat screen tv para sana may pambili ng bigas.

Subali’t ayon sa Malay PNP Substation 4, hindi na magsasampa ng reklamo ang may-ari ng tv laban sa suspek.

Base sa report ng pulis, nangyari ang insidente sa Sitio Minoro, Caticlan bandang alas 11:30 kahapon ng tanghali habang wala umanong tao ang bahay ng biktima.

Ayon pa sa pulis, natuklasan na lamang umano ng biktima na nawawala na ang kanilang flat screen tv sa loob ng kanilang bahay, kung kaya’t kaagad itong nagreport sa mga pulis.

Kaagad namang nirespondehan ng mga pulis ang reklamo hanggang sa may nagsumbong umano sa kanila na may ibinibentang tv doon.

Kasama ang biktima, tinungo ng mga pulis ang bahay kung saan ibibenta na sana ng suspek sa halagang P4,000.00 ang nasabing tv.

Positibo namang kinilala ng biktima ang kanyang tv, kung saan umamin din umano ang suspek sa kanyang pagnanakaw, sabay hingi ng paumanhin at paliwanag na nagawa lamang umano nito ang pagnakaw para may ipambili ng bigas.

Nauwi naman sa areglo ang insidente matapos magpahayag ang biktima na hindi na ito magsasampa ng kaso sa suspek.