LALAKI, ARESTADO MATAPOS MANLOOB SA ISANG OPISINA

Numancia – Arestado ang isang lalaki dahil sa panloloob nito sa isang opisina sa Pusiw, Numancia kahapon.

Nakilala ang suspek na si Emelito Alapag, 34 anyos ng Bakhaw Norte, Kalibo.

Ayon kay PMSgt. Felizardo Navarra Jr. ng Numancia PNP, papasok sana noon sa kanilang opisina ang biktimang si Joan Talislis, nang makita umano nito doon ang suspek habang hawak ang kanyang pouch na naglalaman ng P500.00 at cell phone na nagkakahalaga ng P40, 000.00.

Dahil dito, kaagad nagpasaklolo ang biktima sa mga kapitbahay na nagresulta naman sa pagkakadakip ng suspek na nagtangka pa sanang tumakas.

Pansamantala siyang ikinustodiya sa Numancia PNP station habang inihahanda ang kasong robbery isasampa laban sa kanya ngayong araw.

Samantala, narekober din ang isang kutsilyo na ginamit umano ng suspek sa pagbukas ng pintuan ng opisina.

Napag-alamang dati nang kinasuhan si Alapag taong 2018 dahil din umano sa pagnanakaw sa bayan ng Kalibo.