LALAKI KALABOSO SA PAGNANAKAW NG P66K, NAKUHAAN PA NG ISANG SACHET NG SHABU

Kalaboso ang isang lalaki makaraang pagnakawan ang kanyang kasama sa bahay ng P66,000 kagabi sa Sitio Canyugan, Brgy. Caticlan, Malay.

Nakilala ang suspek na si Jayson Silva Estomaca, 26 anyos, tubong San Joaquin, Iloilo.

Dakong alas-9:30 kagabi nang magsumbong sa kapulisan ang biktimang si Larry Claud Dela Cruz, 42 anyos, matapos madiskubre na nawawala ang kanyang perang nakatago sa kanyang kwarto.

Ayon sa kalive-in partner ng biktima, nakita niya ang suspek na pumasok sa kwarto ng biktima at mabilis na tumakbo.

Sa ginawang hot pursuit operation ng Malay PNP, nahuli sa isang bar sa Brgy. Union, Nabas ang suspek na agad namang lumuhod nang makita ang biktima.

Nang kinapkapan ang suspek bago ipasok sa lock-up cell ay nakuhaan pa ito ng isang plastic sachet ng pinaghinalaang shabu.

Nakatakdang kasuhan ng Theft at paglabag sa Section 11 ng Republic Act 9165 ang naturang suspek.