Lalaki na nag-aya nang inuman, binugbog at sinaksak sa likod

Sa ospital ang bagsak ng isang 26-anyos na lalaki matapos bugbugin at saksakin sa likod ng dalawang suspek sa Sitio Baybay, Barangay Polo sa bayan ng New Washington.

Batay sa ulat ng New Washington PNP, nakilala ang biktima na si Roilan Estoya, 26, tubong Nabas, Aklan at pansamantalang nakatira sa nasabing lugar.

Lumalabas sa imbestigasyon ng mga kapulisan na habang nag-iinuman ang biktima kasama ang mga kaibigan nito ay dumaan umano ang suspek na si Mark Leo Ombao alyas “Puyo Ombao”, 23-anyos at residente rin ng naturang lugar.

Inaya umano ng biktima ang suspek na makipag-inuman subalit tinanggihan ito ni Ombao at sa halip ay hinamon nito ng away si Estoya.

Hindi naman ito pinansin ng biktima ngunit hindi niya akalain na sa kanyang pag-uwi ay aabangan siya ni Ombao at isa pang suspek na nakilalang si Burc Vincent Natal alyas “Ampoy” at saka binugbog.

Sinubukan pa ni Estoya na lumaban ngunit kaagad bumunot ng patalim si Ombao at sinaksak ang biktima.

Kaagad tumakas ang mga suspek samantalang dinala naman sa ospital si Estoya.

Kaugnay nito, kaagad nagsagawa ng manhunt operation ang New Washington PNP at nahuli si Ombao samantalang si Natal ay patuloy pang pinaghahanap ng mga awtoridad.