Lalaki natagpuang duguan at wala nang buhay sa loob ng mismong bahay sa bayan ng Makato

DUGUAN AT WALA NANG BUHAY nang matagpuan sa loob ng tinutuluyan nitong bahay sa barangay Libang sa bayan ng Makato ang isang lalaki nitong Huwebes.

Kinilala ang biktima na si Amir Peñalosa, 53-anyos at residente ng barangay Poblacion sa nabanggit na bayan.

Ayon kay PSSgt. Jover Zubiaga ng Makato PNP, sa kanilang pagresponde, nadatnan nila ang biktima na duguan at wala nang buhay.

Nakita rin nila ang isang basyo ng bala sa loob ng bahay nito.

Nakitaan rin ng sugat sa likod at kaliwang pisngi ang biktima ngunit sa ngayon, ayon kay Zubiaga, hindi pa matukoy kung ang sugat na ito ay tama ng baril.

Batay naman sa inisyal na imbestigasyon ng mga kapulisan, may nakarinig umano ng isang putok ng baril bandang alas-10 kagabi.

Wala din umanong naka-away o kaaway ang biktima sa lugar.

Sa ngayon ay nagpapatuloy pa ang imbestigasyon ng Makato PNP sa insidente.