LALAKI, NATAGPUANG PATAY AT DUGUAN SA KANYANG BAHAY

Patay na at duguan nang matagpuan ang isang lalaki sa kanyang bahay pasado alas 11:00 kaninang tanghali Sitio Pajo, Puis, New Washington.

Nakilala ang biktimang si Jove Jon Parman Natal, 28 anyos ng nasabing lugar.

Sa imbestigasyon ng Radyo Todo, ginising ng kapatid ng kanyang katrabaho kaninang umaga ang biktima para pumasok sa trabaho sa Kalibo, subali’t hindi umano ito sumasagot.

Sa paniniwalang tulog pa ang biktima dahil nakipag-inuman siya kagabi sa kanyang mga barkada, umalis ang inutusang kapatid ng kanyang katrabaho.

Mag-isang pumasok sa trabaho ang kasama ng biktima, subali’t muli nitong inutusan ang kapatid upang sunduin ang biktima bandang alas 11:00 kaninang tanghali.

Makailang beses na itong kumatok ngunit wala pa ring sumagot kaya pumasok na ito sa bahay at doon natuklasang duguan at hindi na gumagalaw ang biktima sa kanyang higaan.

Kaagad namang ipinagbigay alam sa mga otoridad ang insidente.

Narekober sa crime scene ang isang pinutol na kahoy na may dugo.

Patuloy pa ang imbestigasyon ng New Washington PNP sa insidente.