LALAKI, PATAY MATAPOS MALAPITANG BARILIN NG RIDING IN TANDEM

Balete – Dead on arrival sa ospital ang isang lalaki matapos umanong barilin nang malapitan ng riding in tandem bandang ala-1:00 kaninang hapon sa Sitio Maeobog, Calizo, Balete.

Nakilala ang biktimang si Raphael Bautista, 59 anyos ng nasabing lugar.

Base sa inisyal na imbistigasyon ng Balete PNP, kagagaling pa lamang ng ilog ang biktima at nagpapahinga sa loob ng kanyang bahay nang makarinig umano ang ilang residente doon ng isang putok ng baril.

Kaagad umanong tumakas ang dalawang suspek sakay ng motorsiklo, ngunit nakita diumano ng pamangkin ng biktima ang mga suspek.

Ayon sa saksi, nakasuot ng short pants, blue jacket na may nakasulat na AKELCO, at bonnet ang isang lalaki habang nakasuot naman ng  itim na jacket at naka bonnet din umano ang kanyang kasama.

Samantala, narekober naman sa lugar ang isang basyo ng caliber .45 na baril, at isa pang deformed na bala ng kaparehong baril.

Naisugod pa sa ospital ang biktima subalit hindi na ito umabot pa ng buhay.

Nagpapatuloy pa ang imbistigasyon ng Balete PNP kaugnay ng insidente.