Lalaki sinaksak ng kainumang bilas, biktima naospital

Naka-admit ngayon sa ospital ang isang lalaki matapos saksakin ng kanyang bilas habang sila ay nag-iinuman, dakong alas-10:00 kagabi sa Purok 1, C. Laserna St. Brgy. Poblacion, Kalibo.

Nakilala ang biktimang si Joshua Mirabel, 21-anyos residente ng Brgy. Tagas, Tangalan na ngayon ay kasalukuyang naninirahan sa Purok 1, C. Laserna St., Brgy. Poblacion Kalibo at ang suspek naman na si Christian Paul Ibañes, 20-anyos, residente rin ng nasabing lugar.

Napag-alaman na magbilas ang mga sangkot sa nasabing insidente.

Batay sa imbestigasyon ng Kalibo PNP, nag-iinuman ang mga ito habang nag-uusap ng biglang magkainitan.

Nagsuntukan umano ang dalawa pero nakakuha ang suspek na si Ibañes ng kutsilyo na ginamit nito para masaksak si Mirabel.

Nagtamo ng tama sa tagiliran ang nasabing biktima na agad ding dinala sa Aklan Provincial Hospital.

Samantala, agad namang naaresto ang suspek na hanggang ngayon ay nasa kustodiya parin ng Kalibo PNP.