Lalaki, sinaksak ng kapitbahay dahil umano sa dating alitan; suspek, arestado

KULUNGAN ang bagsak ng isang lalaking matapos na saksakin sa tagiliran ang kaniyang kapitbahay sa Barangay Tabayon, Banga nitong Huwebes ng gabi.

Kinilala ang suspek na si Patrick Iguban habang nakilala naman ang biktima na si Rogelio Panganiban at pawang residente ng nasabing lugar.

Sa panayam ng Radyo Todo kay Realyn Dalupe, live-in partner ng biktima, nadatnan umano nila ang suspek na si Iguban sa labas ng kanilang bahay.

Hindi pa nakakapasok ng bahay ang biktima ay kinompronta na ito ng suspek dahil umano sa dati pa nilang alitan.

Mabuti na lamang at napigilan ito ng isang kagawad at tanod na nasa lugar ngunit tumakbo ang suspek sa loob ng kaniyang bahay at kumuha ng balisong at sinaksak ang biktima sa kanyang tagiliran.

Matapos ang insidente ay agad tumakas ang suspek at kalauna’y naaresto ng mga otoridad sa Poblacion, Banga.

Sa ngayon ay naka-confine sa Aklan Provincial Hospital ang biktimang si Panganiban habang nasa kustodiya naman ng mga kapulisan ang suspek na si Iguban at nahaharap sa kasong Frustrated Homicide.