LALAKI, TINAGA NG DATING KAALITAN

Sugatan ang isang lalaki matapos tagain alas 8:30 kagabi sa Sitio Centro, Ambolong, Batan ng dati rin nitong kaalitan.

Sa report ng Batan PNP, sugat sa iba’t-ibang parte ng katawan ang biktimang si Loniel Bautista, 61 anyos ng nasabing lugar, nang tagain ng suspek na si Archie Laurente, 30 anyos ng Lupit, Batan.

Base sa imbestigasyon ng pulis, nag-iinuman noon ang biktima kasama ang ilang kalalakihan, nang marinig umano nila mula sa kalsada ang suspek na nagsisisigaw.

Dahil dito, minarapat umano ng biktima na umuwi, na sinundan naman ng ilan sa kanyang kainuman lalo pa’t alam umano nila na dati nang nagkaalitan ang dalawa.

Samantala, sinasabing iniwas naman ng ilang residente doon ang suspek sa biktima, subali’t hinamon umano niya ito na bumalik.

Nang makita ng biktima ang papalapit na kaaway, kumuha ito ng kahoy at dinaluhong para hampasin, rason naman na pinagtataga sjya nito sa braso at iba pang parte ng katawan.

Isinugod sa ospital si ang biktima habang naaresto naman ang suspek sa manhunt operation ng mga pulis, alas 9:30 kagabi.

Kasalukuyan siyang nasa kustodiya ng Batan PNP para sa karampatang disposisyon.