LALAKING NAGMOMOTORSIKLO, TINAGA SA LIKOD

Sugatan ang isang lalaking nagmomotorsiklo matapos tagain mag-a-alas 3:00 kaninang hapon sa Guadalupe, Libacao.

Nakilala ang biktimang si Jonard Apolinario, 26-anyos, habang nakilala naman ang suspek na si Jonel Zemato, 28-anyos, kapwa residente ng nasabing lugar.

Base sa inisyal na imbestigasyon ng pulisya, nagmo-motorsiklo noon ang biktima kasama ang isang pasahero nang parahin ng nakisakay na suspek.

Pagdating sa madulas na kalsada, pinababa umano sila ng biktima sa motorsiklo kung saan tumalima naman ang isa nitong sakay.

Subalit bigla na lamang umanong bumunot ng kanyang itak ang suspek at tinaga sa likod ang biktima at kaagad tumakas.

Kaagad namang dinala sa Libacao Hospital si Apolinario, habang nabatid na sumuko kinalaunan sa Madalag PNP Station si Zemato kung saan siya naka kostodiya ngayon para sa karampatang disposisyon.

Sinabi naman ng Libacao PNP na may dati na umanong alitan ang dalawa bago paman nangyari ang pananaga.