Lalaking nagsusugal, ginilitan sa leeg sa bayan ng New Washington

SUGATAN ang isang lalaki matapos itong gilitan sa leeg sa Barangay Tambak, New Washington nitong Miyerkules.

Kinilala ang biktima na si Rolando Talabucon, 37-anyos habang kinilala naman ang suspek na si Alfred Rasgo, 40-anyos at residente ng nasabing lugar.

Sa nakalap na impormasyon ng Radyo Todo nagsusugal umano ang biktima sa isang lamay ng dumating ang suspek at sa walang dahilan ay ginilitan nito sa leeg ang biktima.

Kaagad dinala sa Aklan Provincial Hospital si Talabucon at patuloy pang ginagamot sa ngayon.

Samantala, nasa kustodiya na ngayon ng New Washington Municipal Police Station si Rasgo matapos maaresto ng mga awtoridad.

Kaugnay nito, nagpapatuloy pa ang ginagawang imbestigasyon ng mga kapulisan kung ano ang motibo sa nasabing insidente.