Lalaking namaril ng bus, nakaengkwentro at patuloy na tinutugis ng kapulisan

Patuloy na tinutugis ng mga kapulisan ang isang lalaking namaril ng pampasaherong bus kahapon sa bayan ng Ibajay.

Nakaengkwentro pa ng mga pulis ang suspek na si Cristobal Obrique, 28 anyos na taga Pinatuwad, Nabas ng puntahan nila ito kahapon sa Libertad, Nabas.

Kinausap ng mga pulis ang suspek pero itinutok umano nito sa kanyang ulo ang hawak na kalibre 45 na baril at sinabing hindi siya magpapahuli ng buhay sa mga ito.

Plano na umano ng suspek na tumakas habang kinakausap ito ng mga otoridad kaya pinaputukan nito ang mga pulis ng dalawang beses at saka tumakbo papalayo sa lugar.

Hindi na nahabol ng mga kapulisan si Obrique at patuloy na pinaghahanap hanggang sa ngayon.

Nakuha nila mula sa bahay na tinitirahan ng suspek ang 80 live ammunitions ng baril at ang motorsiklo nito.

Batay sa ulat, palagi umanong nagpapaputok ng baril ang suspek sa kanilang lugar at dati na rin itong nakasuhan ng frustrated homicide.