Lalaking nanloob sa isang bahay, arestado; pera at cellphone, narekober

Arestado at nakakulong ngayon sa piitan ng Kalibo PNP Station ang isang lalaki matapos mahuling nagnanakaw sa isang bahay pasado ala 1:00 kaninang madaling araw sa Andagao, Baybay, Kalibo.

Nakilala ang suspek na si Juan Paolo Gabayaran, 27 anyos ng Naile, Ibajay na pormal namang inireklamo sa Kalibo PNP ng may ari ng ninakawan umano nitong bahay na si Lunita Ignacio.

Base sa inisyal na imbestigasyon ng Kalibo PNP, pumasok ang anak ni Lunita na si John Vincent sa kuwarto nilang mag-asawa upang tingnan kung naroon ang kanilang ama, nang maabutan na naroon sa loob ang suspek.

Nasakote umano nito sa loob ng kuwarto ang suspek at narekober mula dito ang handbag ng kanyang ina na naglalaman ng gamot kasama ang nasa P14, 800.00 na pera.

Sa pag-iimbistiga nila sa loob ng bahay, natuklasan nilang sira na ang kanilang sliding window at pintuan sa kanilang kusina, habang naroon din ang motor ng suspek sa labas.

Samantala, narekober din sa suspek ang cellphone ng biktimang si John Vincent.

Tumanggi namang magbigay ng pahayag ang suspek sa insidente.