Lalaking nanloob sa isang tindahan sa Kalibo, nahuli na ng mga awtoridad

Nahuli na ng mga kapulisan ang suspek na nasa likod ng nakawan sa Sitio Libtong, Estancia, Kalibo nitong Miyerkules ng umaga.

Kinilala ang suspek na si Jiit Cezar, 22-anyos at residente ng Tinigao, Kalibo.

Matatandaang pinasok ng suspek at tinangay kahapon ang P8,000 na halaga ng mga sigarilyo at P1000 na cash sa tindahan na pagmamay-ari ni Imelda Nadura.

Napag-alaman na nakilala ang suspek dahil nakita ito sa kopya ng CCTV sa kalapit na bahay ng tindahan kaya agad itong naaresto sa isang computer shop, sa Brgy. Estancia.

Narekober sa suspek ang mga sigarilyo ngunit bawas na at 859 pesos nalang ang natira sa 1,000 na ninakaw nito.

Kinumpirma din ng mga Kalibo PNP na siya rin ang suspek sa panloloob sa isang gasoline station sa bayan ng Kalibo noong Disyembre 26, 2023 ngunit nakalabas ito dahil hindi nasampahan ng kaso.

Sa ngayon ay nasa kostudiya na ng Kalibo PNP ang nasabing suspek at mahaharap sa kasong Robbery na nakatakdang i-inquest sa korte ngayong araw.