LALAKING SINITA SA CURFEW, NAHULIHAN NG BARIL ARESTADO

Arestado ang isang lalaki matapos mahulihan ng baril bandang alas 10:00 kagabi sa Bulabod, Malinao.

Nakilala ang suspek na si Raymund Agustino, 34 anyos ng nasabing lugar.

Sa inisyal na report, nagmomotorsiklo pauwi ang suspek nang makasalubong umano nito ang mga nagpatrolyang pulis.

Samantala, sa ekslusibong panayam ng Radyo Todo sa suspek, aminado naman ito na may dala siyang baril (caliber .45) na nabili niya magtatatlong buwan na ang nakalilipas sa halagang P15, 000.00.

Iginiit din ng suspek na pang depensa lamang umano niya ito sa kanyang sarili dahil malayo ang kanilang lugar, subali’t dinadala lamang umano niya ito sa gabi.

Kinumpirma din nito na walang papeles ang kanyang baril kasama ang 2 magazine na pawang may mga bala.

Pansamantala siyang ikinostodiya ng Malinao PNP matapos arestuhin habang inihahanda ang kaukulang kasong isasampa laban sa kanya.