Lasing na hindi pinautang ng alak at sigarilyo, arestado matapos magwala

Numancia – Sasampahan ng kasong kasong Alarm and Scandal ngayong araw ang isang lasing matapos umanong magwala alas 10:45 kagabi sa isang tindahan sa Bubog, Numancia, nang hindi umano ito pautangin ng alak at sigarilyo.

Maliban sa kasong Alarm and Scandal, sasampahan din ng kasong paglabag sa COMELEC Resolution No.10728 ang suspek na si Jomarie Natabio, 32 anyos ng nasabing lugar matapos namang mahulihan ng patalim.

Base sa report ng Numancia PNP, lasing umano ang suspek nang dumating doon sa tindahan ng nagreklamong si Jonalyn Distor, at uutang sana ng alak at sigarilyo ngunit hindi umano ito pinagbigyan ng huli, rason ng kanyang pagwawala, sabay pagbabanta na babalik.

Ilang sandali pa, bumalik nga ang suspek na may dalang itak at nagwawala, rason na itinawag na ito sa pulis.

Kaagad namang naaresto ang suspek, at kasalukuyang nasa kustodiya ng Numancia PNP, habang inihahanda ang mga nasabing kaso na isasampa laban sa kanya.