Lasing na motorista, sumalpok sa kotse

SUGATAN ang isang motorista matapos na sumalpok at pumailalim sa kasunod na kotse sa kahabaan ng Osmena Avenue, Estancia, Kalibo ngayong Huwebes ng gabi.

Ayon sa drayber ng Toyota Vios, nagulat na lang umano siya ng may biglang  sumalpok sa likurang bahagi ng sasakyan at may mga sumisigaw na mga tao.

Agad namang tumigil sa gilid ng daan ang kotse at dito na tumambad ang lalaki na nakahiga sa daan at ang motor ay nasa ilalim na ng sasakyan.

Nagtamo naman ng sugat sa panga at braso ang drayber ng motor na hinihinalang lango sa nakakalasing na inumin.

Agad naman itong nirespondehan ng MDRRMO Kalibo at binigyan ng paunang lunas.

Wala namang nasugatan sa mga sakay ng kotse.

Samantala nagpapatuloy pa ang imbestigasyon ng Kalibo PNP kaugnay sa nangyaring aksidente.