Lasing na nambato sa isang van sa Nabas na ikinasugat ng graduating student, arestado na

Arestado na ang lasing na nambato sa isang van sa Libertad, Nabas kagabi na ikinasugat ng dalawang pasahero, kasama na ang graduating student na si Mary Jane Plaza.

Sa report ng Nabas PNP, bandang alas 10:00 kaninang tanghali nang maaresto sa mismong pamamahay ang suspek na si Julius Peliado, 22 anyos ng Libertad, Nabas.

Ayon pa sa Nabas PNP, hinihintay pa umano nila ang magiging disposisyon ng pamilya ni Plaza laban sa suspek na si Peliado.

Nabatid naman sa report ng Nabas PNP na nangyari ang insidente alas 10:00 kagabi sa highway ng Libertad, Nabas nang mangyari ang insidente kung saan galing Ibajay papuntang Caticlan ang van na mimamaneho ni Minculado Carpio, 36 anyos ng Bulwang, Numancia nang batuhin ng suspek na nasa kabilang lane ang kaliwang bahagi ng windshield ng nasabing van.

Ayon pa sa Nabas PNP, nabasag ang windshield at tumama ang bato sa biktimang si Mary Jane, at isa pang pasahero na si Regina Coching, 42 anyos ng Balabag, Boracay.

Kaagad namang hinintuan ng driver ang suspek, subali’t mabilis itong tumakbo.
Dinala naman sa Motag hospital ang mga biktima, subali’t inilipat sa pribadong hospital si Mary Jane sanhi ng malubha nitong sugat sa ulo.

Samantala, nabatid na lasing umano noon ang suspek nang batuhin nito ang van.