Maglive-in partner na SLI, tiklo sa drug buy bust ops sa Numancia

TIMBOG sa ikinasang drug buy-bust operation ng mga operatiba ang maglive-in partner sa barangay Bulwang, Numancia nitong Huwebes.

Kinilala ang lalaking suspek na si John Christopher Yabut, 24-anyos at ang live-in partner nitong si Chescery Belarmino, 34-anyos at pawang Street Level Individual (SLI).

Nabilhan si Yabut ng isang sachet ng hinihinalang shabu kapalit ng P7,000 na buy-bust money.

Samantala sa isinagawang body search sa kanya, narekober mula sa kanyang bulsa ang isang kaha ng sigarilyo kung saan nakapaloob ang 10 pang dagdag na iligal na droga at iba oang non drug items.

Mariin namang itinaggi ni Belarmino na sa kanila ang mga nabili at narekober na iligal na droga.

Sa panayam ng Radyo Todo kay PCapt. Conrado Espino Jr, OIC-COP ng Numancia PNP, sinabi nitong matagal na umano nilang minamanmanan ang mag live-in partner.

Sa ngayon ay nasa kustodiya na ng Numancia PNP ang dalawa at mahaharap sa kasong paglabag sa RA 9165 o Comprehensive Dangerous Drugs Acts of 2002.

Ang nasabing operasyon ay isinagawa sa pamamagitan ng pinagsanib na pwersa ng Numancia PNP at PDEU Aklan.