Magsasaka patay matapos saksakin ng kapwa magsasaka sa Brgy. Dingle, Banga

Patay ang isang magsasaka matapos saksakin ng kapwa nito magsasaka nitong Sabado sa Brgy. Dingle, Banga.

Kinilala ang biktimang si Ricky Rivero, 51-anyos na residente ng Brgy. Dingle, Banga habang ang suspek naman ay si Deolito Pineda, 47-anyos na tubong Passi City, Iloilo at kasalukuyan nakatira sa unang nabanggit na lugar.

Pahayag ng suspek sa Radyo Todo, galing umano siya sa sakahan at bibili sana ng maiinom sa may tindahan nang maabutan niya ang biktima na umiinom.

Sinita umano siya ng biktima kaya nagkasagutan sila.

Nakita raw ng suspek na akma itong bubunot ng patalim kaya inunahan na niya ito ng pagsaksak sa dibdib at lalamunan.

Inamin din ng suspek na siya nga ang pumatay sa biktima pero self defense lang umano ang kanyang ginawa.

Napag-alaman na desididong magsampa ng kaso ang pamilya ng biktima habang hinihintay pa ang imbestigasyon ng mga pulis.

Samantala, nakakulong na sa Banga PNP ang suspek habahg hinihintay ang kahaharapin nitong kaso.