Malay PNP handa na sa pagdagsa ng mga turista sa Boracay ngayong Semana Santa

Mahigpit na magbabantay ang mga kapulisan sa isla ng Boracay ngayong Semana Santa.

Ayon kay Police Lieutenant Colonel Don Dicksie De Dios, hepe ng Malay PNP, inaasahan na nila ang pagdagsa ng mga turista sa isla.

Aniya pa, nag-deploy na sila ng dagdag pang mga personnel bilang bahagi ng security at safety operations upang masiguro ang kaligtasan ng mga bisitang nais magnilay-nilay sa Boracay.

Binigyan-diin ni PLt Col. De Dios sa kaniyang mensahe sa isinagawang send off ceremony para sa Ligtas Semana Santa 2023, na sisikapin nilang maging zero incidents ang pagdaraos ng Semana Santa sa isla ngayong taon.

Kung maaalala, walang naitalang major incidents noong nakalipas na taon sa selebrasyon ng Holy Week.