MINI VAN, BUMANGGA SA TRUCK, 2 SUGATAN

Dalawa ang sugatan matapos aksidenteng bumangga sa truck ang isang mini van bandang alas 6:00 kagabi sa highway ng Tagbaya, Ibajay.

Nakilala ang mga biktimang sina Lhemen Mendez, 32 anyos ng Comembo, Makati, driver ng mini van, at kasama nitong si Dominique Pineda, 20 anyos ng Hamtic, Antique.

Base sa imbestigasyon ng Ibajay PNP, nakasunod umano noon ang van sa truck na minamaneho ni Jerold Jaspe, 43 anyos ng San Dionesio, Iloilo na papunta naman sa direksyon ng Nabas.

Subali’t huminto umano ang truck pagdating sa bandang tulay para, magpaubaya sa parating na bus, lalo pa’t maliit ang kalsada doon, nang bigla na lamang umanong bumangga sa likod nito ang mini van.

Dahil dito, wasak ang unahang bahagi ng van, na siya namang ikinasugat ng driver at kasama nito.

Kaagad silang dinala sa Ibajay Hospital, habang nasa impounding area ng Ibajay PNP Station ang mga nasabing sasakyan para sa karampatang disposisyon.