Most wanted person na pumatay sa kanyang kapitbahay sa Libacao, arestado matapos ang halos isang taong pagtatago

NAPASAKAMAY na ng mga kapulisan ang Top 4 Most Wanted Person sa Libacao na may kasong murder at frustrated murder matapos ang ilang buwang pagtatago sa batas.

Ayon kay PCapt. Roel Bereña, hepe ng Libacao PNP nahuli nila kahapon ang suspek na si Jomar Esto, 35 anyos, tubong Dalagsaan, Libacao.

Personal nilang pinuntahan si Esto sa Brgy. Malaguinabot, Calinog, Iloilo kung saan ito nagtatrabaho bilang sikad driver.

Ayon kay Bereña, naglakad ang suspek mula sa Dalagsaan hanggang sa Calinog at doon nagsimulang mamuhay ng mag-isa.

Magugunitang noong Oktubre 2022, sinugod ni Esto ang mag-asawang Lorjie at Cherry Anne Gregorio sa kanilang pamamahay at pinagtataga ang mga ito.

Binawian ng buhay si Lorjie habang ang misis nito ay naospital dahil sa matitinding tama ng pananaga.

Ayon kay hepe P200,000 ang piyansa ni Esto sa kasong frustrated murder at P150,000 naman sa kasong murder.