MOTORISTA, AKSIDENTENG NAHAGIP NG VAN

Sugatan ang isang lalaki matapos aksidenteng mahagip ng pampasaherong van ang minamaneho niyang motorsiklo alas 11:30 kaninang tanghali sa Tondog, Tangalan.

Nakilala ang biktimang si Roger Tugo, sa legal na edad at residente ng Panayakan, Tangalan, at ang driver ng van na si Ronmar Dalida, 33 anyos ng Polo, New Washington.

Base sa inisyal na imbestigasyon ng Tangalan PNP, papunta sa direksyon ng Ibajay ang biktima, habang nakasunod naman sa kanya ang van subalit nawalan umano ng kontrol sa pagmamaneho ang biktima sa hindi nalamang dahilan.

Sinubukan pa sana umano ng van na iwasan ang motorsiklo, ngunit nasagi pa rin nito ang kaliwang manibela ng motorsiklo.

Dahil dito, sumemplang ang motorsiklo at nagtamo ng sugat sa iba’t-ibang parte ng katawan ang biktima.

Kaagad siyang dinala sa ospital, habang nasa kustodiya ngayon ng Tangalan PNP ang driver ng nasabing van.