Motorista patay matapos sumalpok sa nakaparadang truck

Dead on arrival sa ospital ang isang motorist na sumalpok sa nakaparadang truck alas-9:40 ng gabi sa kahabaan ng Brgy. Libas, Banga.

Napag-alaman na 30-anyos ang naturang motorista na residente ng Brgy. San Isidro, Banga.

Batay sa imbestigasyon ng Banga PNP, madilim umano sa lugar at madulas ang daan kaya habang pauwi umano ang biktima mula Pob. Banga ay posibleng hindi nito napansin ang nakaparadang truck at dumeretso ito ng salpok.

Napag-alaman na ang driver ng truck ay isang 29-anyos na residente ng Batan na magdedeliver sana ng mga niyog, saging at iba pang prutas sa Iloilo ngunit pansamantalang tumigil muna sa lugar.

Dahil sa aksidente, nagtamo ng matinding pinsala sa ulo ang motorista dahilan ng kaniyang pagkamatay.

Samantala, nasa kustodiya naman ngayon ng Banga Pnp Ang driver ng truck para sa karampatang disposisyon.