Motoristang umiwas sa checkpoint, nahulihan ng baril

ARESTADO ang isang motorista matapos na umiwas sa checkpoint at mahulihan ng baril kahapon sa Kalibo-Numancia Bridge.

Batay sa ulat, nagsasagawa ng checkpoint ang Kalibo PNP nang dumating ang suspek sakay ng traysikel mula sa Numancia.

Nang makita nito ang checkpoint ay bigla umano itong nag U-turn.

Dahil dito hinarang siya ng mga pulis at hinanapan ng lisensya at mga dokumento.

Walang naipakita ang akusado kaya hinanapan siya ng ID para sa ticket.

Binuksan naman nito ang zipper ng kanyang suot na jogger pants para kunin ang wallet at nahulog ang isang caliber 22 pistol revolver mula sa kanyang bulsa.

Wala ring naipakitang dokumento sa kanyang baril ang suspek kaya ikinustodiya ito ng mga kapulisan.

Mahaharap ang akusado sa kasong paglabag sa RA 10591 o “Comprehensive Firearms and Ammunition Regulation Act”.