MOTORSIKLO, BUMANGGA SA DUMP TRUCK, 2 SUGATAN

Balete – Kapwa sugatan ang rider ng motorsiklo at kanyang angkas matapos bumangga sa isang trak bandang alas 3:00 kaninang hapon sa Sitio Tabayag, Archangel, Balete.

Nakilala ang drayber ng motorsiklong si Rica Mae Barrientos, 23 anyos at angkas nitong si Angel Delos Santos, 23 anyos, kapwa residente ng nasabing lugar, habang nakilala naman ang drayber ng trak na si Elmer Tañon, 23 anyos ng Aranas, Balete.

Base sa imbestigasyon ng pulis, umiwas umano ang trak sa nakaparadang motorsiko sa gilid ng kalsada, kung kaya’t bahagya nitong inukupa ang kabilang linya.

Kaaagad din umano sanang bumalik sa kanyang linya ang trak, subalit tiyempo namang parating ang kasalubong nitong sina Barrientos, na nagulat nang makita ang trak.

Dagdag pa sa imbestigasyon, mabilis ang takbo ng motorsiklo kung kaya’t nawalan na ng kontrol sa manibela si Barrientos at bumangga sa kanang uluhan ng trak bago tumumba sa kalsada.

Dahil dito, kapwa nagtamo ng sugat sa katawan ang dalawa at dinala sa ospital, subalit kaagad inilabas si Barrientos, habang na confine naman si Delos Santos dahil sa tinamo nitong sugat sa ulo sanhi ng pagkakabangga sa headlight ng trak.

Pansamantala namang naka impound sa istasyon ng Balete PNP ang trak at motorsiklo para sa karampatang disposisyon.