MOTORSIKLO, BUMANGGA SA NAKAPARADANG TRUCK

Sugatan ang isang lalaki matapos bumangga sa nakaparadang truck ang minamaneho nitong motorsiklo alas 8:55 kagabi sa Mabini St., Poblacion, Kalibo.

Nakilala ang biktimang si Joseph Exzur Cipriano Salazar, 27 anyos ng Magdalena Village, New Buswang, Kalibo, habang nakilala naman ang driver ng truck na si Jovel Felarca Payas, 35 anyos ng Santiago, Barotac Viejo, Iloilo.

Base sa inisyal na imbestigasyon ng Kalibo PNP, nagmomotorsiklo sa bahagi ng Mabini St. si Salazar papuntang Crossing Buswang nang sumalpok ito sa nakaparadang truck.

Sanhi nito, nagtamo ng pinsala sa ulo at iba pang bahagi ng katawan ang biktima na kaagad ding isinugod sa ospital.

Samantala, sinabi naman ng case investigator na si PSSgt. Joemar Ortega, na nakahanda namang tumulong ang kompanya ng truck sa pamilya ng biktima, at kasalukuyan pa umanong pinag-uusap ng magkabilang panig.

Nabatid na nakaparadang walang anumang early warning device ang truck nang mabangga ng biktima, na naka half-face helmet naman nang mangyari ang insidente.