Motorsiklo bumangga sa tricycle, driver patay

Binawian ng buhay ang isang 24 anyos na lalaki matapos bumangga sa traysikel ang kanyang minamanehong motorsiklo alas 9 kagabi sa Barangay Linabuan Sur, Banga, Aklan.

Kinilala ang biktima na si John Leo Salvador, 24 anyos ng Sibalew, Banga.

Ayon sa imbestigasyon ng Banga Municipal Police Station, minamaneho ni Salvador ang kanyang motorsiklo papuntang Banga pero pagdating sa lugar ay nag overtake ito sa tricycle na minamaneho ni Jay-Ar Andrade, 24 anyos ng Linabuan Sur, Banga.

Nasagi nito ang tricycle ni Andrade at nawalan ng kontrol hanggang sa bumangga ito sa nakasalubong din na tricycle na minamaneho ni Danny Panuncio, 52 anyos ng Bacan, Banga.

Dahil sa malakas na pagkakabangga ay nagtamo si Salvador ng malubhang sugat sa kanyang ulo at iba pang parte na kanyang katawan.

Agad naman itong nirespondihan ng MDRRMO Banga at dinala sa Aklan Provincial Hospital si Salvador ngunit ideneklara itong patay ng mga doktor.

Samantala nagtamo din ng sugat sa katawan si Panuncio.

Patuloy pa sa ngayon ang ginagawang imbestigasyon ng Banga Pnp hinggil sa nasabing insidente.