Motorsiklo sumalpok sa traysikel, driver patay!

Patay ang driver ng motorsiklo matapos aksidenteng sumalpok sa traysikel dakong alas 9:40 kagabi sa Brgy. Buenaswerte, Nabas.

Nakilala ang biktimang si Kenneth Estimado, 33 anyos ng nasabing lugar.

Base sa paunang imbestigasyon ng Nabas PNP, habang sakay ng minamanehong motorsiklo ang biktima galing sa Nagustan papuntang Poblacion, Nabas, aksidente itong sumalpok sa likod ng  traysikel na minamaneho ni Marlon Rubite, 27 anyos ng Gibon, Nabas.

Sa lakas ng pagkakasalpok, pumasok sa likuran ng traysikel ang katawan ng biktima dahilan ng malubha nitong sugat sa ulo at paa.

Kaagad namang isinugod sa Ibajay District Hospital ang biktima pero binawian rin ito ng buhay mga dakong alas 11:00 kagabi habang ginagamot sa nasabing hospital.

Pansamantala namang nasa kustodiya ng Nabas PNP ang driver ng traysikel para sa karampatang disposisyon.