MOTORSIKLO SUMALPOK SA TRAYSIKEL, RIDER SUGATAN

Sugatan ang isang rider ng motorsiklo matapos sumalpok sa isang traysikel, mag-aalas 12:00 kaninang tanghali sa highway ng Dumga, Makato.

Nakilala ang biktimang si Joren Piano, 20-anyos, ng Tina, Makato, habang nakilala naman ang drayber ng traysikel na si Rogie Alaod, 42-anyos ng Mantiguib, Makato.

Base sa imbestigasyon ng pulis, kapwa papunta sa direksyon ng Tina, Makato ang dalawa, nang aksidenteng bumangga ang motorsiklo sa likod ng traysikel.

Mabilis umano ang pagpapatakbo ni Piano, habang sinusubukang mag-overtake, subalit nawalan ito ng kontrol sa manibela.

Dahil dito, sumemplang sa kalsada ang motorsiklo na ikinasugat ng nasabing biktima.

Kaagad naman siyang dinala sa pagamutan, habang mapalad namang hindi nasugatan ang drayber ng traysikel.