Aklan News
Motorsiklong papunta sanang ospital, sumalpok sa vios; drayber pat*y habang 2 angkas, sugatan
DEAD-ON-ARRIVAL sa ospital ang isang motorista habang sugatan naman ang dalawang angkas nito matapos sumalpok sa isang Vios sa bahagi ng Brgy. Lupo, Altavas bandang alas-3:00 nitong hapon ng Linggo.
Ang hindi na pinangalanang drayber ay edad 45-anyos at angkas nito ang isang 42-anyos na babaeng may hika at isang 28-anyos na lalaki na pawang mga residente ng Lucero, Jamindan, Capiz.
Ang kotse naman ay minamaneho ng 28-anyos na babae na taga-Catmon, Altavas.
Sa imbestigasyon ng Altavas PNP, mula ang motorsiklo sa Jamindan, Capiz at papunta sanang ospital.
Pagdating umano sa pakurbada ay sinasabing lumagpas ang motorsiklo sa linya ng kalsada dahilan upang sumalpok ito sa kasalubong na vios.
Isinugod pa ng mga rumespondeng MDDRMO-Altavas sa Altavas District Hospital ang rider pero agad ideklarang dead-on-arrival ng attending physician.
Samantala, inilipat naman sa Provincial Hospital ang dalawang angkas ng motorsiklo na parehong mga sugatan.
Sa ngayon ay nasa kustodiya pa ng Altavas Municipal Police Station ang drayber ng Vios. l Ulat ni Arvin Rompe
