MOTORSITA, NAHULIHAN NG BARIL SA CHECK POINT

Kalibo – Nahulihan ng baril ang isang motorista bandang alas 9:00 nitong umaga sa highway ng Tigayon, Kalibo.

Bagama’t hindi na muna pinangalanan, kinumpirma naman ni PMajor Belshazzar Villanoche, OIC ng Kalibo PNP na ihahabol nila ngayong umaga ang kasong Illegal Possession of Firearm na isasampa sa nasabing motorista.

Ayon pa kay Villanoche, nagsasagawa ng check point ang mga personnel ng Kalibo PNP sa lugar nang dumaan at parahan ang suspek.

Hinanapan umano ito ng kanyang lisensiya, subalit napansin umano ng pulis ang isang magazine ng baril sa sling bag ng suspek.

Kaagad siyang dinala sa Kalibo PNP station at inimbistigahan lalo pa’t narekober din sa kanyang sling bag ang isang 9mm caliber pistol na napag-alamang pagmamay-ari pala ng retiradong pulis, na napaulat umanong ninakaw.

Kaugnay nito, pansamantalang ikinustodiya sa Kalibo PNP Station ang suspek para sa karampatang disposisyon.