NAGMOMOTORSIKLONG PULIS, NAAKSIDENTE SA GINAGAWANG KALSADA, PATAY

Patay ang isang nagmomotorsiklong pulis matapos maaksidente bandang alas 10:00 kagabi sa ginagawang kalsada sa Bacan, Banga.

Nakilala ang pulis na si Patrolman Genard Samson Cesar, 26 anyos ng Manocmanoc, Boracay, at naka assigned sa Nabas PNP.

Base sa imbestigasyon ng pulis, galing Kalibo ang biktima papunta sa direksyon ng Libacao, nang mahulog sa hinukay na bahagi ng kalsada.

Lumalabas pa sa imbestigasyon na tumama sa semento ang ulo ng biktima, habang tumilapon pa umano ng tinatayang 8 metro mula sa kanya ang kanyang motorsiklo.

Sa lakas ng pagkakatama ng ulo sa semento, wasak ang helmet ng biktima, dahilan ng malubha nitong head injury.

Kaagad pa sana itong dinala sa ospital, subali’t hindi na umabot ng buhay.

Samantala, kinumpirma naman ng Banga PNP na may naaksidente ring motorsiklo sa mismong lugar tinatayang isang oras bago naaksidente ang pulis, kung saan sinasabing nabangga nila ang signage na nakalagay doon, subali’t hindi umano nila ito ibinalik, rason naman na posibleng hindi nakita ng pulis.

Sa kabila nito, isinisi parin ng mga residente sa lugar ang insidente sa tila hindi umano makitang signage doon lalo na sa gabi na lubhang delikado para sa mga motorista.