“GAPINAOS EON DO ANANG LIMOG IT SININGGIT IT TABANG” – RESIDENTENG NAKAKITA SA UMANOY BABAENG HUMIHINGI NG TULONG SA LOOB NG KOTSE

NAMAMAOS na sa kakasigaw ng tulong ang babaeng sakay ng puting kotse na nakitang dumaan ng ilang mga residente sa Barangay Regador, Ibajay nitong Biyernes ng gabi.

Ayon sa isang saksi, binulabog sila ng sunod-sunod na sigaw kung kaya’t lumabas sila ng kanilang bahay at doon niya nakita ang babaeng sakay ng nasabing kotse at walang tigil na humihingi ng tulong.

“Kitang-kita ko imaw nga nagapangayo it tabang. Basta nagsinggit malang imaw it tabang. Gapinaos eon do anang limog it sininggit it tabang. Sunod-sunod imaw pinangayo it tabang,” kwento ng saksi.

Aniya hindi nila naaninag ang mukha ng babae kahit nakabukas ang bintana ng sasakyan dahil madilim sa loob nito.

Mabilis din aniya ang takbo nang sasasakyan dahilan na kahit plaka nito ay hindi nila nakita dahil wala rin ilaw sa lugar.

Kaugnay nito, nagpapatuloy pa ang imbestigasyon ng Ibajay PNP at kinakalap pa ang mga CCTV footages na malapit sa lugar.