Nobyo patay, gf sugatan nang bumangga sa pader ang sinasakyang motor

PATAY ang isang motorista habang sugatan naman ang kanyang nobya makaraang mawalan ng kontrol sa minamanehong motorsiklo sa Crossing Banga, Kalibo.

Kinilala ang nasawing si Denzel Mabasa, 24, residente ng Bachaw Sur, Kalibo at ang kanyang angkas na si Hyacinth Maningas, 22, ng Andagaw, Kalibo.

Batay sa ulat, binabaybay ng dalawa ang kahabaan ng Osmeña Avenue papunta sa D. Maagma St. nang mawalan ng kontrol sa manibela si Mabasa at sumalpok sa pader madaling araw nitong Linggo.

Isinugod si Maningas sa Aklan Provincial Hospital habang dinala naman sa isang pribadong ospital si Mabasa na kalaunan ay binawian ng buhay.

Dinala naman ang kanilang motorsiklo sa Kalibo PNP station para sa karampatang disposisyon.