Pampasadang tricycle at kotse nagbanggaan, estudyanteng pasahero sugatan

Nasugatan sa noo ang isang estudyante matapos na masangkot sa aksidente ang sinasakyan nitong tricycle, pasado alas-8:00 ng umaga ngayong Miyerkules sa Martelino St., corner Archbishop St., Poblacion, Kalibo.

Nakilala ang tricycle driver na si Wilfredo Monahan, 44-anyos residente ng Brgy. Camansi sa bayan ng Batan na may dalawang estudyanteng pasahero.

Base sa imbestigasyon ng Kalibo PNP, mula sa direksyon ng C. Laserna St. ang tricycle na papunta sana sa Mabini St. nang aksidente nitong makabanggaan ang kotseng minamaneho ni Buddy Gregorio na galing naman sa XIX Martyrs St. papuntang Shopping Center.

Nagresulta ito ng mga yupi sa bahagi ng parehong sasakyan.

Dagdag pa rito, nabasag ang salamin sa may unahang bahagi ng tricycle dahilan na masugatan sa noo ang isang pasahero.

Samantala, dinala naman ng Kalibo PNP sa kanilang istasyon ang mga driver at mga sasakyang sangkot sa aksidente para sa karampatang disposiyon.