PATAY NA FETUS, NAHUKAY SA GILID NG KULUNGAN NG BABOY

Aksidenteng nahukay ang patay na fetus sa gilid ng kulungan ng baboy sa So. Ilawod, Brgy. Baybay, Makato dakong alas 7:30 kaninang umaga.

Ayon kay Serafin Valencia, may-ari ng bahay, katulong niya si certain Roger kaninang umaga na maghukay ng lupa para sana lagyan ng poste sa gagawing bubong ng kulungan ng baboy.

Mga isang talampakan pa lamang umano ang nahukay ni Roger ng may makita ito na pigura na akala nila ay isang laruan lamang.

At para masiguro, binuhusan umano niya ito ng tubig at tumambad ang fetus na lalaki na tinatayang nasa 7 buwan at nakakabit pa ang pusod nito.

Ayon naman kay Rotcher Bartolome, anak ng may-ari ng bahay na wala silang ideya kung sino ang may gawa ng pagbaon ng bata sa mismong lugar nila.

Aminado naman ito na madalas may mga pumupunta sa kanilang lugar na mga taga ibang barangay para maligo sa dagat. Sabi pa nito na noong nakaraang gabi ng Linggo mga alas 10 ng may narining umano silang kaluskus sa likod bahay pero isinawalang-bahala naman umano nila ito dahil maliban sa madilim, umuulan pa.

Nakabakod din umano ang kanilang bahay pero aminado na wala namang lock ang pinaka-gate nito.

Agad naman na ipinagbigay alam ng pamilya ang nasabing insidente sa opisyales ng brgy.

Nirespondihan naman ito ng Makato PNP at Makato MDRRMO para sa karampatang disposisyon.