Patrol car ng Kalibo PNP, sinalpok ng pampasaherong tricycle

Wasak ang bumper at basag ang kaliwang headlight ng Kalibo Pnp patrol car matapos salpukin ng isang pampasaherong tricycle sa harap mismo ng police station sa Jaime Cardinal Sin, Brgy. Andagao, Kalibo kagabi.

Napag-alaman na residente ng Brgy. Estancia ng kaparehong bayan ang tricycle driver na nasa impluwensya ng nakalalasing na alak.

Ayon sa mga kapulisan, mula sa  direksyon ng Pob. Kalibo ang patrol car at papaliko  na sana para magparada sa istasyon nang dumaan ang rumaragsang tricycle na mula sa direksyon ng New Washington.

Sinasabing dahil sa kalasingan ay hindi na napansin ng tricycle driver ang patrol car kaya ito sumalpok.

Sa lakas ng impact, wasak ang bumper at basag ang headlight ng patrol car habang nawasak rin ang tangke ng motorsiklo ng tricycle.

Maswerte at naitaas pa umano ng tricycle driver ang paa kaya sugat lamang sa bibig ang natamo nito.

Sa ngayon ay nasa kustodiya ng Kalibo Pnp ang tricycle para sa karampatang disposisyon.