PICK UP NA MAY KARGANG GALON-GALON NA GASOLINA, NALAMBAT SA CHECK POINT

Nahaharap sa kasong paglabag sa RA 1865 o Illegal Transport of petroleum products ang isang driver at kasama nito matapos maharang sa checkpoint alas 8:35 kagabi sa Poblacion, Nabas na may kargang galon-galon na gasolina sa isang pick-up.

Sa impormasyon mula sa Nabas PNP, nakilala ang driver na si Enrique Labus, 28 anyos at ang kasama nitong si Lean Jay Tambagahan, 24 anyos, kapwa residente ng Jinalinan, Pandan, Antique.

Ayon sa mg kapulisan, kaagad umano silang nagsagawa ng check point nang matunugan ang pagdaan ng isang pick-up na may kargang gasolina at ng pahintuin doon umano nila nakita ang iba’t-ibang mga container ng gasolina, subalit wala umano silang maipakitang dokumento para dito.

Kaagad namang kinumpiska ng mga pulis ang kanilang kargang gasolina.

Nasa kustodiya naman ngayon ng Nabas PNP ang dalawa at nakatakdang sasampahan ng kaukulang kaso.