PITO, KALABOSO DAHIL SA ILEGAL NA SABONG

Ibajay – Nahaharap sa kasong paglabag sa PD 449 o Cockfighting Law ang 7 naaresto dahil umano sa ilegal na sabong dakong ala 1:00 kahapon sa Aquino, Ibajay.

Nakilala ang mga naarestong sina Aldrick Bantang, 39 anyos; Rolan Dalisay, 39 anyos; John Tosita, 34 anyos; Apollo De Jose, 47 anyos; Wilfe Colangoy, 31 anyos; Rio Silva, 33 anyos; at Rex Villahermosa, 41 anyos, lahat residente ng nasabing lugar.

Ayon sa Ibajay PNP, isang anti-gambling operation ang kanilang ikinasa matapos matunugan ang ilegal na aktibidad sa lugar.

Kasunod nito, naaresto ang mga suspek at nakumpiska ang 2 manok panabong, at kabuuang P1,570.00 na pera.

Kasalukuyan silang nasa kustodiya ng Ibajay PNP Station habang inihahanda ang nasabing kaso na isasampa laban sa kanila.