PUBLIC HOSPITAL SA BORACAY, MULING BUBUKSAN

Boracay island, Malay – BUBUKSAN na muli sa lunes ang Don Ciriaco Tirol Memorial Hospital makalipas ang mahigit isang buwang pagkakasarado dahil sa Covid 19.

Ito ang kinumpirma ni Aklan Provincial Health Officer Dr. Cornelio Cuachon.

Ayon kay Cuachon, negative na ang confirmatory test sa lahat ng 25 medical staff ng nasabing hospital na isinailalim sa quarantine.

Matatandaang sinarado noong nakaraang March 17 ang DCTMH matapos naging suspected Covid 19 ang isang doctor nito na nanggaling sa Manila na kinalaunan ay naging positibo at ngayon ay naka isolate sa Aklan Training Center.

Agad ring nagsagawa ng disinfection sa nasabing hospital at hindi na muna pinauwi ang mga medical staff nito.

Ayon kay Dr. Cuachon, nadelay ng ilang araw ang reopening dahil nagsagawa pa sila ng paglilinis at paghahanda ng mga kagamitan para sa pagtanggap ng mga pasyente.