Pulis sinaksak ng lasing, suspek arestado

Sugatan ang isang pulis matapos saksakin ng lasing bandang alas 10:20 kagabi sa Man-up, Altavas.

Nakilala ang biktimang si PSgt. Edmar Aranas, 34 anyos ng Old Buswang, Kalibo, at kasalukuyang nakadestino sa Aklan Police Provincial Office, habang arestado naman ang suspek na si Rex Perlas, 36 anyos ng naunang nabanggit na lugar.

Base sa imbestigasyon ng Altavas PNP, off duty umano noon ng nasabing pulis na nakipag-inuman sa kanyang kapamilya sa isang tindahan doon, Kinalaunan, dumating ang lasing na suspek na hindi naman imbitado at nakisali sa grupo ng biktima.

Base pa sa imbestigasyon, nagalit umano ito nang tamaan sa paa ng plastic na bala ng airgun na pinaputok ng anak ng bayaw ng biktima.

Lumalabas pa sa imbestigasyon na umalis umano ang suspek subali’t bumalik at humingi ng pasensya sa mga kainuman.

Kasunod nito, bigla na lamang umano nitong pinagsasaksak ang biktima ng nagtamo ng nasa 7 sugat sa katawan.

Kaagad siyang dinala sa ospital, habang naaresto naman ang suspek at kasalukuyang nasa kustodiya ng Altavas PNP para sa karampatang disposisyon.

Tumanggi namang magbigay ng pahayag ang suspek nang magising sa loob ng lock up cell ng Altavas PNP.